Violensia relashonal
Violensia relashonal ta violensia kometé den relashonan amoroso i den seno famiar te den terser grado. E tema tin atenshon spesial di Ministerio Públiko desde 2004. Na 2010 a adapta e instrukshon i na 2017 esaki a haña atenshon spesial komo un instrukshon pa BES, Sint Maarten i Korsou. Minsiterio Públiko ta persigui tur kaso di violensia relasonal
Dor di e relashon dependiente aki un parti di e víktimanan no ta hasi denunsia. Serka nan tin e miedu ku si nan hasi un denunsia por kousa un empeoramentu di nan situashon en bes di un solushon. Un otro rason pa keda sin hasi denunsia por ta ku e víktima ke pa e violensia stòp, pero ku e no ke pa e perpetradó wòrdu kastigá. Pa protehá e grupo di víktimanan aki i pa tòg invitá nan pa hasi nan denunsia, Ministerio Públiko a nombra violensia relashonal komo un di su prioridatnan.
E punto di salida den kasonan di violensia relashonal ku por wòrdu probá ta persekushon, pero si e víktima i e malhechor indiká ku nan ke sigui den un relashon ku otro, e ora ei lo konsentrá mas bien riba ayudo (obligatorio). Den e kasonan ei, Ministerio Públiko por skohe di no trese e kaso dilanti di hues, pero pa en bes di esei hasi e malechor un oferta pa prevení persekushon penal. E oferta ei por konsistí di sigui e instrukshonnan di reclassering i/òf sigui un entrenamentu pa prevení mas agreshon. Si e malhechor ta kumpli ku e kondishonnan poné, e ora ei e kaso lo no bai dilanti hues, a ménos ku e malechor kai den ripitishon.
Tin biaha e denunsiante ta indiká ku e ke hala su denunsia aden. Hurídikamente esei no ta posibel. E denunsiante por skibi un karta na fiskal pa duna di konosé dikon persekushon (ya) no ta deseabel. E fiskal no ta mará na e kontenido di un karta asina. Un di e rasonnan pa esei ta pa prevení ku e víktima ta retraktá su denunsia bou di preshon di e malhechor i ku asina persekushon lo no tuma lugá.
Pa por garantisá e seguridat èkstra di un víktima, hues tin e posibilidat pa disidí ku e (supuesto) malhechor no tin mag di buska kontakto ku e víktima òf hasta no tin mag di yega den besindario di e víktima. Pa por kontrolá e (supuesto)malhechor, e hues por dikta ku e (supuesto) malhechor mester kai bou di Vigilansha Elektróniko, ku ta buta ku por verifiká i kontrolá e andar di esun ku ta bou di vigilansha .
Pa finalisá, hasta den kasonan ei di violensia relashonal grave, kaminda e víktima ta duna di konosé eksplísitamente ku e no ke hasi denunsia, polis lo purba tòg di haña sufisiente prueba pa Ministerio Públiko por persiguí ofishalmente.
Violensia relashonal mester stop di tur manera; e víktima mester wòrdu protehá.