Tokante di Ministerio Públiko

TOKANTE DI MINISTERIO PÚBLIKO

Personanan sospechá di a kometé un echo kastigabel, ta haña di haber ku Ministerio Públiko (OM). OM ta e úniko instansha ku por hiba sospechosonan dilanti di hues penal. OM ta soru pa rastreá i persiguí echonan kastigabel.

Pa hasi esei, ta kolaborá ku polis i otro servisionan di rastreamentu. E fiskal ta na kabes di e investigashon. Ademas, OM ta supervisá e ehekushon korekto di sentensianan di huesnan; butnan mester wòrdu pagá, kondenanan di prison mester wòrdu sintá, mester hasi kastigunan alternativa korektamente. Huntu ku e huesnan, OM ta parti di e poder hudisial. Por lo tanto OM no ta un ministerio den e sentido usual di e palabra.

E paisnan Kòrsou, Sint Maarten i Ulanda i Boneiru, Sint Eustatius i Saba (BES) kada unu tin su propio OM. Kada un di e tres OMnan independiente aki tin un parkèt den promé instansha bou di maneho di un fiskal mayó (HOvJ). Na kabes di tur e OMnan tin un prokurador general (PG) konhunto, ku ta okupá su karga den kada pais. E parkèt di PG ta, konforme ku artíkulo 3, insiso 1 di Lèi di Estado tokante di Ministerionan Públiko, establesé na Kòrsou. PG ta den un posishon kaminda e mester responsabilisá su mes na e ministernan di (seguridat) i hustisia di Kòrsou, Sint. Maarten i Ulanda.

Den apelashon, OM ta wòrdu representá dor di PG, òf e ta wòrdu hasí na nòmber di PG dor di abogado general, ku tambe ta traha na parkèt PG. Aparte di un departamentu ku ta okupá ku apelashon den kasonan penal, tin un departamentu na parkèt PG ku ta responsabel pa e maneho di tur e parkètnan. E atministrashon di empresa aki ta apoyá e parkètnan den promé instansha pa nan por konsentrá prinsipalmente riba e proseso primario, es desir e mantenshon penal di órden hurídiko. Un di tres tarea di parkèt di PG ta unu ku tin di haber ku polítika. E parkèt ta kordiná e enfoke konhunto, spesialmente di kriminalidat ku ta pasa frontera i ta traha i vigilá áfspraknan tokante di logronan ku a ser trahá ku e parkètnan den promé instansha den kuadro di planning & control.