Parkèt di Fiskal

PARKÈT DI E MINISTERIO PÚBLIKO

E parkèt di e fiskalnan (OvJ) (tambe: Parkèt den promé instansha) ta parti di Ministerio Públiko (OM) i ta responsabel pa e rastreamentu i persekushon di echonan kastigabel.

E fiskal tin e outoridat i e mando riba investigashonnan di polis. E fiskal ta disidí si e ke trese un kaso penal dilanti di hues of no (diskreshon di fiskal). E fiskal por hasi un proposishon  pa resolvé e kaso di un otro manera (por ehèmpel dor di un speot kondishonal òf un transakshon). Si e fiskal disidí di someté e kaso na hues, e ta aktua komo e kehadó públiko. Durante di e seshon di korte den sala di korte, e Fiskal ta demandá un kastigu. Alfin, e hues ta disidi si i si ta asina, ki tipo di kondena ta wòrdu imponé.

E fiskal mester sigui un prosedura estrikto ku ta kodifiká den lèi. E hues mester kontrolá si e reglanan ta wòrdu apliká bon. Den sala di korte e sospechoso ta mira e Fiskal den su papel komo kehadó públiko. Den un toga pretu ku un krag blanku. Durante di e seshon den korte, e fiskal ta bisa pa kiko e persona mester wòrdu husgá.  Despues di esaki, e hues ta hasi pregunta na e sospechoso tokante di e kaso. E fiskal ta haña un chèns di hasi pregunta, méskos ku tambe e abogado di e sospechoso. Despues e Fiskal ta tene su rekisitorio: un disertashon kaminda e ta bisa e hues kiko e ta haña di e kaso i kaminda ku e ta demandá un kastigu. Esei por ta un straf di sèn, un kondena di trabou òf un kastigu di prizòn.
Ora ku e fiskal ta na palabra den sala di korte, semper e ta para. E hues, ku ta sintá dilanti di e sospechoso semper ta keda sintá. Pa e rason ei, e miembronan di Ministerio Públiko ta wòrdu yamá e magistratura pará. E huesnan ta forma parti di e magistratura sintá.

E fiskal mester soru tambe ku e sentensianan di e hues penal wòrdu ehekutá. E, por ehèmpel, ta manda polisnan a buska hendenen ku no ta paresé i ku mester sinta un kastigu di prizòn ahinda. Por paga butnan di sèn na e lokèt di e parkèt.