Parkèt di PG
Parkèt di prokurador general
E institushon i organisashon di Parkèt di prokurador general di Kòrsou, di Sint Maarten i di Boneiru, Sint Eustatius en Saba (Parkèt PG) ta determiná den artíkulonan 2 te ku 6 di Lèi di Estado di Ministerio Públikonan. Segun artíkulo 2 di Lèi di Estado di Ministerio Públikonan, e Ministerio Públiko den kada un di paisnan ta konsistí di Parkèt PG i e Parkèt di e Fiskal (tambe konosí komo” Parkèt den promé instansha). Pero tin solamente un prokurador general konhunto ku ta establesé na Kòrsou (artíkulo 3 insiso 1). E ta okupá su kargo den tur e paisnan.
E prokurador general
E prokurador general (PG) ta na kabes di henter e organisashon di OM. E Lèi di Estado di Ministerio Públikonan ta otorgá prokurador general ku sierto tareanan i responsabilidatnan. Manera a menshoná kaba, e ta duna maneho na e tres organisashon nashonal di tres diferente pais. Ku mira riba esei, e mester tin deliberashon regularmente den tur e paisnan. Ademas, e PG ta den un posishon kaminda e mester responsabilisá su mes na tres diferente minister di (seguridat) i hustisia i ta konsehá nan sea ku a wòrdu solisitá of no den kuestionnan ku ta toka OM.
Konforme ku artíkulo 6 insiso 3 di e Lèi di Estado di Ministerio Públikonan prokurador general ta supervisá e debido rastreamentu i persekushon di echonan kastigabel (e ‘proseso primario) i artíkulo 5 insiso 4 ademas ta duna prokurador general e outoridat pa duna instrukshonnan general i partikular tokante di e ehekushon di e tareanan i kompetensianan di Ministerio Públiko.
E mester supervisá e ministerio públikonan no solamente pa ku tareanan operashonal (rastreá i persiguí), pero tambe pa lokual ta konserní maneho. Aparte di esei, PG ta responsabel pa e asina yamá “di dos instansha”, e apelashon den kasonan penal i por ultimo e ta responsabel pa e kordinashon di e enfoke di kriminalidat ku ta pasa frontera.
Parkèt PG
E departamentu ‘Strategía i Polítika’ i un Atministrashon di Empresa ta apoyá e Prokurador general.
E departamentu di Strategía i Polítika ta apoyá PG den e figurashon di e polítika stratégiko, e desaroyo di polítika, e implementashon i evaluashon di esei i e siklo di ‘planning & control’.
E Atministrashon di Empresa na un banda ta responsabel pa e eksplotashon interno di e empresa pa Parkèt PG. Di otro parti e departamentu ta desempeñá e funshon di maneho konhunto pa Ministerio Públiko ku ta den e Lèi di Estado di Ministerionan Públiko ku ta enkargá PG lu esei (artíkulo 28 Lèi di Estado di Ministerionan Públiko). Departamentu di Personal, departamentu finansiero i ICT ta wòrdu reglá sentral dor di e Departamentu di Atministrashon.
Ambos departamentu ta prinsipalmente situá na Kòrsou denter di parkèt PG na Kòrsou, pero nan trabou ta dirigí riba tur tres Ministerio Públiko.
Un parti importante di Parkèt PG ku no ta eksplisitamente menshoná den e skema akiriba, ta wòrdu formá dor di e Parkèt den di dos instansha, ku ta wòrdu yamá ofisina di Abogado General. E Abogado General (AG) ta duna maneho funshonal na e trahadónan denter di e ofisina aki. Ademas e AG ta enkargá ku e tratamentu di di kasonan penal den apelashon, e ehekushon di desishonnan penal di e Korte Komún di Hustisia, duna konseho tokante di tareanan legal i e fomento di kalidat hurídiko den promé i di dos instansha. Den Parkèt PG tin dos abogado general ta traha. Unu ta stashoná na Kòrsou i e otro na Sint Maarten. Aunke ku esun menshoná promé ta en prinsipio esun ku ta prinsipalmente lo hasí e trabou pa Kòrsou i BES i e otro prinsipalmente pa Sint Maarten, nan por apoyá otro i sustituí otro.