OM ta para ketu na Dia kontra trafikashon di hende

Trafikashon di hende ta enserá diferente aspekto manera reklutá, transportá, hiba, alohá un persona bou di preshon, violensia, menasa òf otro mal trato. E por sosodé tambe dor di ekstorshon òf malusá posishon vulnerabel di un persona. Tin biaha ta duna òf risibí sèn òf otro benefisio pa haña un persona su outorisashon pa haña kontrol riba e persona. Meta di trafikashon di hende ta pa eksplotá e persona, por ehèmpel dor di obligá e persona pa traha òf dor di saka su órganonan. Esaki ta loke ta nifiká trafikashon di hende.

Kon bo ta rekonosé un persona ku ta víktima di trafikashon di hende?

Kada tipo tin su propio karakterístikanan.  Pero ora ta trata di trafikashon di hende tin mas di un siñal ku ta mustra ku integridat físiko di un persona ta seriamente afektá i ku nan derechonan humano ta violá.

Por ehèmpel si un persona mester traha hinter dia largu sin sosegá, si obligá un persona pa duna servisio di sèks, traha pa un salario hopi abou, òf kita un persona su libertat (tambe) for di ora di trabou dor di su doño di trabou. Esakinan ta ehèmpel di siñal ku por mustra ku ta trata di trafikashon di hende.

Kiko Ministerio Públiko ta hasi kontra di trafikashon di hende?

E tarea di mas importante di Ministerio Públiko ta persiguí personanan ku kometé echonan kastigabel den kuadro di trafikashon di hende. Ministerio Públiko tin fiskalnan spesialisá i un tim ku ta enfoká riba trafikashon i kontrabanda di hende. Di e manera aki, Ministerio Públiko ke reforsá e bataya kontra di e tipo di kriminalidat aki. Banda di tratamentu di kasonan penal, tambe riba nivel di maneho Ministerio Públiko ta traha pa kombatí trafikashon i kontrabanda di hende. Nan ta kontribuí na kampañanan di konsientisashon di e Taskforce Trafikashon di hende i tambe di Actiecentrum Ondermijning Curaçao (ACOC). Riba un plaso kortiku, Ministerio Públiko lo bini ku un karchi di e señalnan di trafikashon di hende.

Si bo ta rekonosé siñalnan òf bo ta sospechá ku un persona ta víktima di trafikashon di hende, mèldu esaki! Den kaso di emergensia yama polis na 911 of por bel 108 e liña di tep anónimo di polis. Pa yudansa na víktima por yama 679-7575 ku ta e number di pikèt di uitvoeringsorganisatie Justitiële Zorg