Ministerio Públiko ta eksigí multanan pa banko klandestino, Servisio finansiero sin lisensia ta kastigabel
Siman pasá, e fiskal di Ministerio Públiko BES a eksigí multanan di $40.000 i $10.000 kontra dos persona durante tratamentu di un kaso penal. Tabata sospecha e personanan aki di a duna servisio finansiero pa añanan largu, den kolaborashon ku otro y un otro persona, sin tin pèrmit rekerí di De Nederlandsche Bank (DNB).
Esaki tambe ta wòrdu yamá banko klandestino. Despues di un kantidat di señal ku Ministerio Públiko a risibí for di Unidat di Inteligensia Finansiero (FIU), Kuerpo Polisial di Karibe Hulandes a hasi un investigashon ekstenso riba e aktividatnan di transakshon di plaka.
E investigashon aki a mustra un volúmen total di transakshon di mas ku 2.2 mion dòler Merikano. Mas aleu a konfirmá e sospecho ku ámbos persona strukturalmente a duna servisio finansiero sin e lisensia rekerí di DNB. Konforme artíkulo 2:1 di Lei di Merkado Finansiero di BES, no ta permití pa hasi aktividatnan di transakshon di plaka sin un pèrmit asina.
E servisionan finansiero di e ofisinanan di transferensia di plaka aki tabata konsistí di aseptá sèn kèsh na Boneiru i despues transferí e plaka ei, despues di kita komishon, pa un kuenta na Repúblika Dominikana. Despues a hasi e sèn pagabel na benefisiarionan einan.
A hasi un entrada hudisial den e investigashon kriminal aki na yanüari 2023. E aktividatnan di transakshon di plaka tabata andando e tempu ei ainda pero despues a keda suspend”e.
Realisá transakshonnan finansiero komersialmente sin e lisensia nesesario ta un kompetensia inhustu kompará ku ofisinanan di transakshon di plaka ku ta kumpli ku e obligashonnan legal. E echo ku no tabatin ofisinanan di transakshon legal riba e BES e tempu ei no ta kita for di e echo kastigabel. Organisashonnan di transakshon di plaka ku ta operá ilegalmente ta vehíkulonan fásil pa labamentu di plaka pa entradanan di aktividatnan kriminal, pasobra e fluho di plaka a traves di pagonan kèsh ta difísil pa sigui i e investigashon debido di kliente ku ta rekerí pa lei, no ta sosodé. Esaki ta pone integridat di e sistema finansiero na peliger.
P’esei ta importante pa duna servisio finansiero bou di supervishon di gobièrnu. DNB ta e outoridat di supervishon i lisensiamentu pa servisionan asina. Dunadónan di servisio finansiero tambe por informá transakshonnan no usual na FIU.
Ministerio Públiko ta konsiderá un but komo un modalidat apropiá pa kanselá ámbos kaso penal. Promé ku tur kos, pasobra dunamentu di e servisionan a stòp i sospechosonan a koperá den e investigashon penal. Pero tambe pasobra den kaso di ehekushon atministrativo en bes di intervenshon penal, en prinsipio tambe lo a imponé un but.
Finalmente Ministerio Públiko a anunsiá ku lo inisiá un proseso pa kita e bentaha finansiero optené pa e sospechosonan.