Trata i trafikashon di hende

Trata di hende ta un delito serio i ta un violashon grave di e derechonan humano.  Eksplotashon ta sentral denter di e konsepto aki i e sirkunstanshanan ku e víktimanan di trata di hende ta haña nan mes aden ta generalmente chokante. Eksplotashon di hende ta sosodé den diferente variante i sektornan. E variante mas konosí ta eksplotashon den e sektor di prostitushon. Víktimanan, generalmente hende muhé, hopi biaha ta wòrdu saká for di un otro pais bou di promesanan falsu.  

Una bes nan yega den e pais di destino, ta empleá nan bou di sirkunstanshanan similar na sklabitud i hopi biaha nan mester hasi otro trabou ku lokual nan a bisa nan promé ku nan partida.  Aktualmente kada bes tin mas atenshon pa otro tiponan di eksplotashon na lugá di trabou. Ta parse ku hopi hende den otro sektornan tambe ta traha bou di e mesun tipo di sirkunstanshanan similar na sklabitud. Mundialmente, hende hòmber i mucha tambe hopi biaha ta víktima di trata di hende.

Tur kaso tin en komún ku e trafikante di hende ta saka benefisio ekonómiko for di un hende su posishon di dependensia bou di preshon òf  engaño. Ademas di esei tambe ta wak si tin sirkunstanshanan inhumano kaminda e derechonan fundamental – integridat físiko, integridat mental of libertat personal – a ser violá.

Mundialmente, e tópiko aki kada bes ta hañando mas atenshon i prioridat. Na Kòrsou tambe e desaroyo aki ta riparabel. For di e momentu ku e kódigo di lèi nobo di Kòrsou a drenta den vigor, a amplia e ártikulo di trata di hende (artíkulo 2:239 WvSr). Kaminda promé solamente trata di hende muhé (artíkulo 260 WvSr bieuw) tabata kastigabel, awor eksplotashon di hende hòmber i hende muhé den otro sektornan ta kastigabel.
Den e Memorandum of Understanding (MoU) pa kolaborashon pa prevení i kombatí trata i trafikashon di hende ku a wòrdu redaktá entre e paisnan denter di Reino Ulandes, ta responsabilisá Prokurador General pa ku e ehekushon di e áfspraknan riba e tereno di e ehekushon penal di trata di hende i otro formanan di delitonan di migrashon, manera por ehèmpel trafikashon di hende. Den e diferente dokumentonan di polítika di OM, por mira anualmente kiko OM a hasi i kiko e ophetivonan pa futuro lo ta riba kada tereno. Ademas di esei, OM ta pone e kolaborashon entre e partnernan den kadena (hudisial) komo prioridat pa ku e tópiko aki. Pa finalisá, OM ke kontribuí na un konsientisashon pa ku e tópiko aki denter di nos komunidat. Ministerio Públiko, lo duna atenshon aktivo na e tipo di kriminalidat doloroso i hopi biaha poko visibel den medionan di komunikashon, kaminda ku ta posibel.

Kontakto:
StichtingSlachtofferhulp
Kuerpo Polisial Kòrsou