Training pa seguridat den tráfiko komo kastigu pa komportashon peligroso i uso di alkohòl den tráfiko
Willemstad – Riba djárason 14 di sèptèmber, Korte di Promé Instansia a kondená tres (3) persona pa sigui un training di seguridat den tráfiko. Dos di e kondenadonan a hasi nan mes kulpabel na pasamentu den lus kòrá ku a resultá ku nan a okashoná un aksidente. Un otro tabata kore su vehíkulo bou di influensia di alkohòl. Banda di e kastigu di training, e persona ku a kore bou di influensia a haña un but i a pèrdè su reibeweis temporalmente.
Ministerio Públiko (OM), Reclassering i Asosashon di Tráfiko Sigur Kòrsou a uni forsa pa hinka e training den otro. E training aki ta konsistí di sinku (5) seshon di dos (2) ora kaminda e partisipantenan bou di guia di coachnan ta dediká atenshon na reglanan di komportashon den tráfiko, responsabilidat di kada un persona ku ta trafiká riba nos kareteranan i e konsekuensianan di un komportashon robes den tráfiko.
E training no ta boluntario. Si e partisipante no partisipá kompletu na e training, òf no finalisá esaki ku éksito, e ta riska di haña un kastigu remplasante.
OM ta hopi satisfecho ku e training aki por a wòrdu realisá. Al fin i al kabo nos komunidat i e ofensor tin muchu mas na un kurso ku ta dirigí riba prevenshon di komportashon peligroso den tráfiko kompará ku un but òf trabou di kastigu.
OM huntu ku Reclassering i Asosashon di Tráfiko Sigur Kòrsou lo evaluá e trainingnan. E espektativa ta ku OM lo bai hasi uso mas biaha di e kastigu di trainingnan aki pa mehorá seguridat den tráfiko.