Tráfiko

Anualmente ta lamentá hopi víktimanan di tráfiko. No solamente esnan ku ta keda heridá, pero desafortunadamente tambe mortonan den tráfiko. Hopi biaha e rason di e aksidente ta pasombra di komportashon peligroso riba kaya, manera kore muchu duru.

Pa hasi tráfiko mas seif, polis ta hasi kòntròlnan regularmente. Pensa riba duna but pa kore sin rèibewèis, kore dor di lus korá, kore sin faha di seguridat, yama na telefòn sin sèt di ‘hands free’ i  kòntròlnan pa velosidat.

Kontrolá pa poseshon di un karchi di inspekshon tambe ta kai bou di esaki. Di e manera aki, ta stimulá kada doño di kada vehíkulo pa bai laga su outo ser kontrolá dor di Keuringslokaal kada dos aña pa seguridat den tráfiko.

No ta hasi kòntròlnan di tráfiko solamente pa prevenshon di aksidentenan. Polis ta kontrolá regularmente tambe pa poseshon di prueba di seguro i prueba di pago di impuesto. Si kada partisipante den tráfiko sigurá su outo bon, tur eventual daño den un aksidente por wòrdu reglá mas fasil. Pa e impuesto ta konta ku e mester wòrdu pagá pa e poseshon di un outo.

E reglanan di tráfiko di Kòrsou ta registrá den lèinan, ordenansanan i reglamentonan.

Un par di lèi i ordenansa di tráfiko importante ta:

• Ordenansa di Tráfiko di Kòrsou 2000 
• Ordenansa di Impuesto di vehíkulonan di Kòrsou 
• Lei di seguro di responsabilidat di vehíkulonan Kòrsou

Den e reglamentashon por ehèmpel, tin skibí ku ki rekisito di diseño bo outo mester kumpli.  E obligashon pa tin un seguro pa un vehíkulo ku bo ta subi kaya ku ne i ku bo mester paga impuesto di vehíkulo (motorisá) tambe tin pará aden.

Es ku no wanta su mes na e lèinan of e ordenansanan, ta sea kometé un infrakshon (esei ta un echo kastigabel leve) òf un delito (un echo kastigabel kaminda ta duna un kondena di prizòn).

Ora ta konserní un infrakshon no ta nada si bo a hasi’é intenshonalmente, ora ta konserní delitonan si esaki ta hasi un diferensha. 

Na ora ku un infrakshon òf un delito keda konstatá, den sierto kaso polis por skibi un OPV (but pa infrakshonnan) òf traha un prosèsferbal. Ta manda esei Ministerio Públiko. Ministerio Públiko tin direktiva pa e tratamentu di e tipo di kasonan aki. Den sierto kaso bo ta haña e posibilidat pa paga un transakshon, pa prevení ku e kaso ta yega dilanti hues. Den e direktivanan di Ministerio Públiko, e alturanan di e transakshonnan ta registrá. Bo mes tambe por haña e sumanan bèk riba e OPV (riba e parti djatras).

Si bo no paga e transakshon ofresé (na ora), e kaso lo keda presentá dilanti di hues. Na e seshon den korte, fiskal lo eksigí un but ku ta mas haltu ku e suma di transakshon.

Si akaso bo tin pregunta tokante di reglanan di tráfiko i/òf un but ku bo a haña, bo por dirigí bo mes na e trahadónan di Ministerio Públiko Kòrsou.