Sospechosonan den investigashon Themis dilanti hues
Djaluna 9 di mei 2022 Korte di Promé Instansia a kuminsá ku tratamentu den kontenido di e kaso penal kontra di e kuater (4) sospechosonan den e investigashon yamá Themis. Ta trata di R.L. di 41 aña, S.P. di 37 aña, C.L. di 49 aña i A.E. di 35 aña ku den novèmber 2020, febrüari 2021 i mart 2021 a keda detené na Kòrsou. Tres (3) di e sospechosonan ta den aresto preventivo for di dia di nan detenshon. Di djaluna 9 di mei te ku djabièrnè 13 di mei lo trata e kasonan penal kontra di nan den Korte.
Ta sospechá nan di a forma parti di un organisashon ku ta yama nan mes No Limit Soldiers (NLS). Ministerio Públiko ta sospechá ku NLS ta un koperashon kriminal. Segun sospecho di Ministerio Públiko, e organisashon aki ya pa hopi tempu ta dediká nan mes na trafikashon di droga i ta responsabel pa diferente asesinato na Kòrsou, Sint Maarten i Hulanda. Otro echonan kastigabel ku ta reprochá e sospechosonan di dje i ku Korte lo trata ta e provokashon di dos asesinato na Sint Maarten, provokashon di ekstorshon i labamentu di plaka. Banda di esaki, ta akusá un di e sospechosonan di diferente echo di droga entre otro un transporte di droga di 172 kilo di kokaina for di haf di Kòrsou pa haf di Le Havre na Fransia.
Themis ta e investigashon di delitunan kometé den e último añanan den diferente pais den Reino Hulandes i den eksterior. Spesífikamente pa e investigashon aki a forma un ekipo di investigashon spesial, ku ta konsistí di miembronan di kuerponan polisial di Sint Maarten, Kòrsou, Aruba i Recherche Samenwerkingsteam (RST). E ekipo investigativo aki ta ser dirigí dor di Fiskal di Sint Maarten i Fiskal di Kòrsou.