Sospechoso miembro di NLS ekstraditá pa Reino Hulandes
Un sospechoso di inisial C.S.H. miembro haltu di e organisashon kriminal ‘No Limit Soldiers’ (NLS) a keda ekstraditá dor di Reino Uní pa pa Reino Hulandes. E ta keda den detenshon.
Pa motibu di e prosedura legal ekstenso, e prosedura di ekstradishon di C.S.H. a dura mas òf ménos dos aña. Ku esaki, un otro parti di e investigashon Themis a terminá.
Un parti di e investigashon Themis I ya a keda presentá dilanti hues den Korte di Promé Instansia na Kòrsou i kuater sospechoso a keda kondená. Dos di e sospechosonan a bai den apelashon. E siman benidero ta sigui ku tratamentu di Themis II den Korte na Kòrsou. E kaso ta trata diferente aktividat kriminal di e organisashon kriminal NLS na Kòrsou i Sint Maarten.
Segun OM, e organisashon kriminal pa hopi tempu kaba ta involukrá den trafikashon di droga, labamentu di plaka i ta responsabel pa diferente asesinato kometé na Kòrsou, Sint Maarten i Hulanda.
Den e kaso Themis a inisiá un investigashon pa ku echonan kastigabel ku a tuma lugá den e último añanan den diferente pais den i pafó di Reino Hulandes. Speshal pa e investigashon aki a lanta un tim di reshèrshi konhunto ku ta konsistí di miembro di kuerponan polisial di Kòrsou, Sint Maarten, Aruba i tambe di RST. E tim ta operá bou di direkshon di Ministerio Públiko di Kòrsou i di Sint Maarten.