Seshon Temátika – Poseshon ilegal di arma
Poseshon ilegal di arma di kandela ta un prekupashon grandi pa e seguridat di nos komunidat. Den un esfuerso desidido pa atendé ku e menasa aki, outoridatnan a ehekutá vários akshon durante di desèmber ‘23 te ku febrüari ’24. Durante di e kòntròlnan aki, a konfiská vários arma.
Djabièrnè 5 di aprel 2024 último, tabata tin un seshon temátika na Korte di Promé Instansha di Kòrsou. Sinku sospechoso, di kual kuater a keda kondená, mester a responsabilisá nan mes dilanti hues pa nan poseshon ilegal di arma di kandela.
Hues a kondená sospechoso 1 di akuerdo ku e demanda di fiskal, esta un kondena di prizòn pa e durashon di dieskuater (14) luna, di kual ocho (8) luna kondishonal ku un periodo di prueba di tres (3) aña.
Sospechoso 2 i 3 a risibí un kastigu di akuerdo ku e demanda di kastigu di binti (20) luna, di kual dies (10) luna kondishonal ku un periodo di prueba di tres (3) aña pa poseshon ilegal konhunto di arma di kandela na un sitio di dibertishon.
A persiguí sospechosonan 4 i 5 pa un arma di kandela ku a haña bou di stul di shofùr di un vehíkulo. Un di nan a haña un kondena di prizòn di diesocho (18) luna inkondishonal.
E otro, di akuerdo ku e demanda, a keda apsolvé mirando ku no por a prueba ku e arma ku a haña bou di e stul di un vehíkulo tabata pertenesé na dje.
Poseshon di arma di kandela ta un problema grandi na Kòrsou i ta perturbá e komunidat na gran eskala. E kasonan penal aki ta asentuá e dedikashon di outoridatnan pa garantisá seguridat di e komunidat i manehá poseshon ilegal di arma penalmente. Dor di traha ku instansianan ku ta mantené órden i manda un mensahe kla ku no ta tolerá poseshon di arma, ta aspirá na un komunidat pasífiko pa tur habitante di Kòrsou.
Pa atendé ku poseshon di arma ilegal, Ministerio Públiko ta traha huntu ku otro organisashonnan den kadena hudisial via Actiecentrum Ondermijning Curaçao (ACOC). Na Kòrsou, poseshon di arma ta prohibí segun e ordenansa di arma di kandela: ta prohibí pa tin un arma di kandela òf munishon ku reserva di algun eksepshon. E outoridat pa tin un arma di kandela ta korespondé solamente na un entidat di derechi públiko manera servisionan di rastreamentu, asosiashonnan di tiru. Es ku violá e prohibishon aki, por haña un kastigu di prizòn di máksimo kuater (4) aña òf un but di máksimo 10 mil florin.