Persona ku hopi but mester bai sinta kastigu di prizon
Ministerio Públiko ta hasi un yamada urgente na tur persona ku ainda tin but habrí, pa bin paga esaki mas pronto posibel òf pa drenta den areglo di pago. Di e forma aki ta evitá ku e persona ta keda detené i ku e mester sinta un kastigu di prizon supsidiario imponé pa hues.
Resientemente un persona a keda detené ku for di 2011 ta haña dos te tres but pa aña. Durante un kontrol na momentu di chekeo den sistema di registrashon a bin sali na kla ku e persona aki tabatin un kantidat di but habrí pa motibu di entre otro korementu di outo sin reibeweis bálido, seguro i karchi di kùr bálido na mas ku un okashon. Den pasado Ministerio Públiko a yama e persona aki pa bin paga su butnan, pero el a laga di hasi esaki. Pa e motibu ei, Ministerio Públiko a disidí di ehekutá e detenshon supsidiario, loke ta enserá ku e persona aki lo mester keda será pa 153 dia pa motibu di no paga butnan. Evitá un situashon desagradabel asina. Paga bo butnan habrí òf drenta un areglo di pago.
Ofisina di Paga Bo But ta situá na Waaigat, p’ariba di ofisina di Curoil riba Abraham Chumaceiro Boulevard 11. No por paga kèsh mas, solamente swaip ku bo karchi di banko. Por hasi pago tambe online via bo banko riba kuenta di MCB 23329801. Ministerio Públiko ta konsehá kada persona ku tin but habrí, pa pasa paga e transakshon promé ku e kaso bai Korte i evitá ku e but ta subi. Sigui nos tambe riba Facebook: Paga bo But. Por haña mas informashon tambe tokante di but habrí via Whatsapp: +59994342120 òf +59994342122.