Pa di tres biaha masterclass di mediashon den kasonan penal i hustisia restorativo
Durante e dos simannan ku a pasa, pa di tres biaha un masterclass a keda organisá tokante di mediashon den kasonan penal i hustisia restorativo. Na aprel di 2022 a prepará un grupo selektá pa bira mediadó den kasonan penal. E mediadónan aki mes por bai guia mediashonnan den kasonan penal na Kòrsou despues di e estudio. Ku esaki, sospechoso i víktimanan por papia ku otro bou di guia profeshonal tokante lokual ku a pasa i lokual ta nesesario pa koregí òf restorá esaki. Ministerio Públiko i Korte lo hasi uso di e resultado (konklushon) di esaki pa despacho di e kaso. E posibilidat aki ta banda di e forma di mediashon eksistente na Kòrsou (hustisia/práktika restorativo) ku ta los di derecho penal.
Siman pasá un grupo di 12 partisipante a terminá e speshalisashon pa bira mediadó restorativo. Por hasi uso di mediashon restorativo na momentu ku e partidonan tin e nesesidat pa un konfrontashon sea promé òf despues di un proseso penal dor ku esaki ta yuda nan den nan rekuperashon emoshonal. Esaki por ta e kaso, por ehèmpel, ora ku e kaso no keda tratá dor di Hustisia òf ora ku disidí di no hasi denunsia. Ademas, mediashon restorativo por tuma lugá despues ku un outor keda kondená. Mediashon restorativo ta tuma lugá semper di manera boluntario, o sea solamente na momentu ku tur dos partido ke partisipá.
Ta añadí mediashon den kasonan penal i mediashon restorativo komo dos posibilidat banda di e posibildat eksistente di Hustisia/Praktika restorativo, ku riba nos isla ya ta eksistí independientemente di derecho penal. Esaki ta nifiká ku den kada fase, tin un oportunidat pa e personanan impliká den kasonan penal pa drenta den kontakto ku otro i pa nan mes por pensa i papia ofer di e lokual ku nan mester pa futuro i pa nan rekuperashon.
Hopi partsipante di entre otro OM, ZM, polis, AJJC, Fundashon Nos Téi Pa Otro, Slachtofferhulp, GGZ, SDKK, Skuchami i abogasia awor ta na altura di e formanan aki di hustisia restorativo.
Sra. Rebecca Leeuwenberg i Sra. Kim Roelofs, ámbos di Amsterdam, a duna e masterclass i e estudio nan. Nan ta registrá den e registro di kalidat di Federashon di Mediashon Hulanda (MfN) i banda di esaki nan ta dosentenan kualifiká registrá na CRKBO (centraal register kort beroepsonderwijs). Na Kòrsou nan a traha huntu ku e dosente anfitrion Sra. Lisette Poppen ku ta traha na Ministerio Públiko. E proyekto ta wòrdu realisá den koperashon ku Ministerio Públiko i Korte Komun di Hustisia. Banda di esaki Corendon a yuda hasi esaki posibel.