Ministerio Públiko ta kuminsá ku un investigashon di imágen pa komprondé persepshon di públiko
Willemstad, Kòrsou 22 di desèmber 2023 – Ministerio Públiko di Kòrsou ta anunsiá ku desde awe, djabièrnè 22 di desèmber, nan a kuminsá ku un investigashon di nan imágen. For di awe por yena un kuestionario kaminda públiko por laga sa kiko nan persepshon di Ministerio Públiko ta.
E kuestionario ta diseñá pa haña un bista amplio di opinion i perspektivanan ku ta biba den komunidat di Kòrsou. Ministerio Públiko ta duna hopi balor na transparensia i honestidat i ta mira e investigashon aki komo algu esensial pa promové diálogo ku pueblo i drecha e kalidat di nan servisio.
"Komo Ministerio Públiko nos ta para mei mei di komunidat. Ta di gran importansia pa nos komprondé kon komunidat ta mira nos i kon nos por drecha nos servisio," segun Heiko de Jong, fiskal mayó di Ministerio Públiko. "Nos ta enkurashá tur hende pa yena e kuestionario online, pa asina nos tin un bon bista di e opinion i nesesidat di nos komunidat.”
Por yena e enkuesta te ku fin di febrüari 2024 via di e lenk aki. Ministerio Públiko ta pidi hinter pueblo di Kòrsou pa partisipá i ta enfatisá ku lo trata tur fitbèk di un manera konfidensial.