Mediadónan kalifiká nobo den kasonan penal na Sint Maarten, Boneiru i Kòrsou

Mediadónan ku a haña training ta guia e kontakto entre e sospechoso i e víktima. Durante di e mediashon, víktimanan i sospechosonan por papia bou di guia profeshonal tokante e suseso i loke ta nesesario pa (parsialmente) korigié òf drech’e. Ministerio Públiko i Korte ta tuma e resultado (akuerdo final) na konsiderashon ora di resolvé e kaso. Partisipashon semper ta boluntario, pues solamente si e sospechoso i e víktima ámbos ke esei. Mediashon den kasonan penal no ta un sustitushon di derecho penal, e ta un suplemento balioso ku ta brinda hustisia na e personanan mes. Mediashon por wòrdu usá den tur kaso penal, si e partidonan envolví ta adekuá pa esaki. E kondishon ta ku e sospechoso mester ke tuma responsabilidat pa su parti den e delito.

Mediashon den kasonan penal lo ser agregá na e posibilidat pa implementá Restorative Justice/ Practice, ku na e islanan ya ta eksistí los for di e lei penal, i lo suplementá esaki. Esaki ta ofresé un posibilidat na tur fase, tantu promé, komo durante i despues di un kaso penal, na esnan ku ta envolví den un delito pa drenta den kontakto ku otro i pa nan mes pensa i papia tokante loke nan mester pa nan futuro i rekuperashon.

Hopi partisipante di entre otro SRCN, OM, ZM, KPCN, Slachtofferhulp, Voogdijraad i Gevangeniswezen aworakí ta na altura di e formanan aki di derecho di rekuperashon.

E Masterclass-nan i e kurso a keda organisá dor di Sra. Rebecca Leeuwenberg i Sra. Kim Roelofs di Amsterdam. (mediadónan registrá na MfN, dosentenan registrá na CRKBO). Señor Mr. Guillano Schoop, Prokurador General di Parkèt OM Carib, ta partisipá den e training komo dosente invitá.

E Masterclass i e spesialisashon ta ser ko-patrosiná dor di Corendon.