Maneho di “Aktua Robes, Sinti’é un bes” durante tur marcha di karnaval
Ministerio Públiko (OM) i Kuerpo Polisial di Kòrsou (KPC) tin seguridat di e siudadano komo enfoke prinsipal durante periodo di Karnaval 2023. Huntu lo aktua ku man duru kontra violashon di lèi durante tur e marchanan i mantené un régimen di sero-toleransia.
Tur hende for di 12 aña ku ta den serkania di e ruta di karnaval i riba kaya públiko, mester tin un prueba di identidat bálido. Polis lo kontrolá a base di e ordenansa di 20 di mei 2002, esta e lèi ku ta regardá deber di identifikashon (identificatieplicht).
A base di e Ordenansa de Arma di Kandela, OM, meskos ku añanan anterior, a emití un órden di listramentu preventivo na polis. E listramentu preventivo ta bálido promé, durante i despues di e marchanan di karnaval. Ta nifiká ku polis por listra kalke persona sin ku mester tin un sospecho adelantá di poseshon di arma di kandela.
KPC i OM lo aktua severo den tráfiko i kontrolá esnan ku ta manehá vehíkulo, tantu esnan riba 2 wil, esta motosaikel i skuter, komo esnan riba 4 wil, manera quad i outo. Pa vehíkulonan riba 2 wil ta konta ku, konforme ku lèi, tantu e shofùr komo e okupante mester tin un hèlm adekuá bistí. Polis no ta tolerá òf akseptá butamentu di fever, hòp i/òf drift ku outo, motosaikel, skuter òf otro vehíkulo. Den e kaso aki nan lo keda konfiská i e shofur lo wordu detené. Esnan ku outo, motosaikel, skuter òf quad mester ta den poseshon di tur dokumento (karchi kùr, karchi belasting, seguro) i un reibeweis bálido. Si no kumpli ku tur e reglanan aki, lo detené e persona(nan) den inkumplimentu ku e reglanan i lo konfiská e vehíkulo en kuestion. Na warda di polis lo ofresé e persona en kuestion un transakshon. Si e paga esaki mesora, e lo risibí un deskuento di 15%. Si tur e rekisitunan ta na òrdu por pasa tuma vehíkulonan konfiská bèk for di 15 di mart.
Si faya ku lèi durante karnaval , ta aktua mesora i ku man duru. P’esei e lema “Aktua robes, sinti’é un bes”.
Dia 24 di aprel 2023 a reservá un dia den Korte pa tur esnan ku a risibí un dagfar. E persona ku ta skohe pa un dagfar ta kore e riesgo di un kastigu di prisòn, un but haltu i un karchi di kastigu.