Landsrecherche di Kòrsou ta detené empleado di SBAB
WILLEMSTAD – Siman pasá Landsrecherche Kòrsou a detené un sospechoso ku ta traha na Stichting Belasting Accountants Bureau (SBAB) riba sospecho di soborno i violashon di sekreto profeshonal.
E hòmber, den su funshon komo ámtenar, ta keda sospechá di a pasa informashon konfidensial pa un siudadano ku a saka òf por a saka benefisio for di esaki. Na e momentunan aki ta investigando e deklarashon ku e sospechoso a duna. E sospechoso no ta será mas i lo mester responsabilisá su mes na un otro okashon pa su aktonan.
Landsrecherche ta un órgano investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.