Koperashon KPC i RST - Otro detenshon den kaso di robo di droga na warda di polis
Willemstad – Den anochi di 16 di desèmber 2021, otro detenshon a tuma lugá den e investigashon Inex 2.0. Tim di Aresto a detené e hòmber (38) pasobra di embolbimentu den e robo di droga for di warda di polis Rio Canario. Ta sospechá e hòmber di a bende e blòkinan di kokaina.
E detenshon aki ta sigui unu hasí djarason pasá. E tim di investigashon, ku ta konsistí di miembronan di KPC i RST, ta sigui ku e investigashon di e robo di 2018. No ta ekskluí ku lo tin mas detenshon den e kaso aki. E hòmber ta detené bou di restrikshon i lo ser presentá dilanti hues komisario djaluna benidero. Den interés di e investigashon no por duna mas informashon na e momento aki.