Konsepto di Kódigo di kondukta di OM entregá na ministernan

Ton Maan, Prokurador General di Kòrsou, Sint Maarten, Boneiru, Sint Eustatius i Saba a entregá e konsepto di e Kódigo di Kondukta na e ministernan pa aprobashon. Despues di esaki, e kódigo lo ta na vigor pa parkèt di Prokurador General i e ministerionan públiko di Kòrsou, Sint Maarten i di islanan-BES. Despues di aprobashon e kódigo aktualisá ta remplasá e vershon anterior ku a keda implementá na aña 2016.

Durante di e entrega , Ton Maan a enfatisá ku segun e área di trabou di OM ta kambia, internamente e organisashon tambe mester adaptá. Pa e motibu aki e kódigo revisá ta reflehá e kambionan aki.

E ophetivo prinsipal di e Kódigo di Kondukta ta un énfasis riba e responsabilidat individual di kada trahadó na momentu di opservá i promové komportashon desente, esaki adishonal na e normanan formal. E dokumento aki ta artikulá e balornan fundamental di OM Carib i ta brinda guia pa e kondukta di e organisashon.