Investigashon desaparishon i morto di Mike Venema
Diferente medio lokal a hasi pregunta na Ministerio Públiko pasobra di, entre otro, un komunikado ku Peter R. de Vries Foundation a emití. Pa e motibu aki Ministerio Públiko di Kòrsou a haña nesesario pa saka e komunikado aki.
Riba djabièrnè 14 di sèptèmber 2018, amigunan di Mike Venema ku e tempu ei tabatin 53 aña di edat a hasi denunsia di su desaparishon. Dos dia promé (12 di sèptèmber 2018) tabata e último biaha ku a mira Mike Venema na bida.
Lunanan a pasa sin ningun rastro di Mike Venema, te ku dia 5 di yüli a haña e restunan mortal di Mike Venema den un pikòp Ford Raptor den fondo di laman na altura di Shut. Polis forénsiko i táktiko a hasi investigashon i tur kos ta mustra ku Mike Venema a pèrdè su bida dor di un delitu.
Investigashon di desaparishon i morto di Mike Venema ta andando ainda. E investigashon ta tumando lugá tantu na Kòrsou komo Hulanda pa motibu ku tin indikashon ku na Hulanda tin persona ku sa mas tokante e kaso aki. Kuerpo polisial i OM di Kòrsou ta traha huntu ku “Dienst Regionale Recherche van de Politie-eenheid Den Haag” (Departamentu Regional di Investigashon Penal di Unidat di Polis Den Haag) i OM Den Haag.
Debí na desaroyonan resien den e kaso aki, a efektuá diferente trámite den e investigashon último dianan tantu na Kòrsou komo Hulanda. Lo sigui ku esaki den e próksimo dianan. Te ainda no a realisá ningun detenshon den e kaso aki, pero no ta ekskluí esaki den próksimo dianan.
Na e momentu aki no por duna mas informashon tokante e investigashon.