Hóbennan

Hòbennan ta nos futuro. E hòbennan di awor ta e adultonan di mañan. Adultonan – te ku un sierto punto -  tin influensha riba e desaroyo di hòbennan. E influensha ei ta un responsabilidat ku henter komunidat mester ta konsiente di dje. Derecho penal por solamente kontribuí parsialmente den e fomento di e desaroyo di hòbennan.   

Kòrsou ta tratando di desaroyá un enfoke ku ta envolví henter komunidat pa ku hòbennan i Ministerio Públiko kontinuamente tin atenshon pa e situashon partikular di hòbennan.
Ministerio Públiko ta hasi esaki entre otro dor di desaroyá sanshonnan penal mas na midi pa hòbennan. Artíkulo 208 di kódigo di enhuisiamentu penal ta establesé ku si por konsiderá  ku e basenan pa persekushon ta presente, e fiskal, teniendo na kuenta tur sirkunstansha, mester konsiderá promé si e kaso por keda resolvé via di un otro manera ku no ta esun hudisial.  E disposishon aki ta habri kaminda pa desaroyá medidanan mas spesífikamente orientá riba hòbennan.  Pa esaki OM ta buska kolaborashon ku partnernan relevante (esnan opvio i esnan menos opvio) te asina leu ku esei no a wòrdu hasí ahinda. Inisiativanan manera e konsepto di “kas di siguridat”*  mester haña atenshon kontinuo den tur pais i wòrdu ekipá ku sufisiente rekurso pa nan tin e mihó chèns pa tin éksito. 

Na fin di 2011 a implementá un Kódigo di Lèi Penal nobo na Kòrsou ku tin un régimen apart pa ku hòbennan.
E fiskal ku tin e kartera di kasonan di hòbennan ta miembro di un komishon ku ta enkargá ku redakshon di e plan polítika hudisial pa hòbennan.  Ademas, e fiskal di hòbennan ta dirihí, durante di e temporada di planiamentu, e deliberashon mensual di kasonan di hòbennan. Meskos ku den kasonan di violensha relashonal, ta di importansha den kasonan di hòben atendé i resolvé pa nan wòrdu atendé i resolve lihé. Den e kuadro aki, Ministerio Públiko ta aspirá pa un desishon  denter di sinku luna despues ku e kaso di e hòben (den libertat) a keda registrá na parkèt.

* Den e konsepto di e kas di seguridat varios organisashon ta kolaborá ku ta envolví den seguridat i mantenshon, na moda ku regulamente tin interkambio di informashon ta tuma lugá tokante di hòbennan di riesgo òf preokupante. Na Kòrsou ja tin deliberashon pa ku kasonan entre Ministerio Públiko, polis i jeugdreclassering (parti di Voogdijraad). Un siguiente paso lo ta apuntá “polisnan pa hòben”. Finalmente gezinsvoogdij instelling i e leerplichtambtenaar tambe mester ta envolví den e konsepto aki.