Fugitivo Yu di Kòrsou Q.E.P. detené na Sint Maarten
Awe mainta e hòmber Q.E.P., ku for di 2013 ta fugitivo di hustisia di Kòrsou, a keda detené na Sint Maarten. Na 2018 Korte di promé instansia di Kòrsou a kondená Q.E.P den ousensia na un kastigu di prizòn di 18 aña pa homisidio kalifiká, atrako ku konsekuensia fatal i poseshon di arma di kandela.
Riba 9 di mei 2013, Q.E.P. i su ko-outor S.P.L.F. a kometé un atrako armá na Hua Jiang Minimarket situá na Oude Caracaasbaaiweg. Durante e atrako, a tira e doño di e minimarket mata den presensia di su kasá i yunan. Riba grabashon ku a paresé den notisia i ku a sirkulá riba medionan sosial, testigunan a rekonosé Q.E.P. Algun dia despues, Q.E.P. a hui for di Kòrsou i for di e momento ei no tabatin ningun indikashon di su paradero.
Petishonnan di hustisia pa informashon òf tep na Kòrsou, Hulanda i St. Kitts & Nevis no a resultá den su detenshon.
Resientemente outoridatnan internashonal a lokalisá Q.E.P na Dominica, kaminda e tabata biba pa algun tempu bou di un identidat falsu. Outoridatnan lokal a deportá Q.E.P. pa Sint Maarten, kaminda su detenshon a tuma lugá.
Lo trasladá Q.E.P. pronto pa Kòrsou kaminda e lo sinta su kastigu di prizòn.