FIU I OM A UNI RIBA ‘PROYEKTO NO-REGISTRASHON’
Unidat di Inteligensia Finansiero Kòrsou (FIU) i Ministerio Públiko (OM) ta uni forsa pa promové registrashon di kompanianan na FIU. Esaki ta importante pa kumplimentu ku lei i regulashonnan kontra labamentu di plaka i finansiamentu di terorismo i proliferashon.
Di akuerdo ku e Ordenansa Nashonal pa Mèldu Transakshonnan Inusual (LvMOT), institutonan i profeshonnan manera akountent, makelar, abogado, konsehero di impuesto i komersiantenan di vehíkulo of di material di konstrukshon, mester registrá na FIU. Esaki ta obligatorio for di 2015, pero no ta tur kompania ta kumpli. E proyekto di no-registrashon den e turno aki a enfoká riba makelarnan i komersiantenan di vehíkulo ku anteriormente a risibí un karta di FIU pa registrá. FIU a hasi denunsia na Ministerio Públiko pa ku e kompanianan ku no a duna oído na esaki.
E koperashon aki a resultá den sinku inskripshon nobo na FIU. Tambe tabatin vários de-registrashon for di Kámara di Komèrsio i un kambio di statuto. Kompanianan ku no a reakshoná mester presentá den korte na mart 2025.
Kombatimentu di labamentu di plaka ta esensial pa prevení krimen di indole serio i tambe froude finansiero. Purba skonde orígen di entradanan ku ta prosedente di krímen ta permití e outornan di e krímennan aki pa keda fuera di alkanse di outoridatnan investigativo i asina disfrutá di e propiedatnan prosedente di krímen. Pa kontra arestá e práktikanan aki, institutonan finansiero i no-finansiero i tambe sierto profeshonnan mester registrá serka nan respektivo reguladó (FIU, Banko Sentral di Kòrsou i St. Maarten òf Curaçao Gaming Authority) i mèldu transakshonnan inusual di akuerdo ku e lei LvMOT na FIU a traves di e portal di mèldu ‘goAML’. FIU na su turno ta analisá e informashonnan aki i ta manda transakshonnan deklará komo sospechoso komo inteligensia (informashon) pa Ministerio Públiko pa mas investigashon. Mèldu transakshon na FIU ta indispensabel pa por atendé ku labamentu di plaka, pues ta importante pa institutonan sigui kumpli ku nan obligashonnan.
Koperashon entre FIU i Ministerio Públiko mester garantisá mihó kumplimentu ku lei i tambe un maneho efektivo ora ta trata di delitonan finansiero.
Pa mas informashon tokante FIU, kua institushonnan i profeshonnan mester registrá, i e reglanan i proseduranan ku ta konta pa agentenan di reportahe, bishitá www.fiucuracao.cw.