Elekshon 2025: Kompra i benta di voto ta kastigabel
Dia 21 di mart 2025 tin elekshon pa un Parlamento nobo di Kòrsou. E diferente partidonan polítiko ta bai hiba kampaña pa logra haña mas tantu voto pa di e forma ei haña representashon den Parlamento.
Elekshon liber, sekreto i hustu ta base di un estado di derecho demokrátiko. E importansia ta ankrá den Areglo di Estado i den kombenionan.
Un votadó tin e derechi pa emití su voto sin ningun influensia i pa tene su eskoho sekreto.. Si bo kumpra òf bende voto, bo ta kometé ‘soborno elektoral’ i por risibí a base di artíkulo 2.44 di nos Kódigo Penal, un kastigu di prizòn di máksimo dos aña.
Ora ta trata di kompra i benta di voto, hopi biaha un potrèt por prueba pa ken bo a vota pa asina bo risibí un pago. . Pa e motibu aki den e Reglamentu di votashon (Kiesreglement) artíkulo 68ª ta stipulá ku ta prohibí pa saka potrèt di bo papel di vota ora bo a kaba di vota. Kompra i benta di voto ta mina e prinsipionan fundamental di elekshon liber i hustu i konsekuentemente ta kastigabel. Ta pidi votadónan pa ta alerta i pa reportá kasonan di kompra i benta di voto na Konseho Supremo Elektoral, Polis i/o Landsrecherche. Por hasi esaki via number di telefòn 676-4770 o anónimo na number di telefòn 108. Tambe por klek riba e link òf skèn e QR code pa hasi notifikashon. Pa medio di un kompromiso kompartí ku enfoke riba transparensia i integridat nos por protehá balornan demokrátiko.