Èks-agente polisial detené na Hulanda den investigashon di robo di droga na warda di polis na òktober 2018
Willemstad – E tim di investigashon Inex2.0 ta yega bèk for di Hulanda awe. Riba 18 i 22 di yanüari, despues ku na desèmber 2021 a hasi varios detenshon na Kòrsou, a hasi detenshonnan na Hulanda tambe. Dos hende hòmber di 27 i 33 aña di edat a keda detené ku e intenshon di ekstraditá nan pa Kòrsou.
Promé ku e arestonan a tuma lugá, e wes komisario na Kòrsou a dikta un orden di detenshon pa e sospechosonan pa un periodo di 8 dia. Mientrastantu, den ambos kaso, a prolongá e plaso aki ku 8 dia mas. Un di e sospechosonan ku a keda detené na Hulanda ta un èks agente polisial di Kuerpo Polisial di Kòrsou. Ku e aresto di e hòmber aki, e tim di investigashon i Ministerio Públiko ta ferwagt ku nan a pone e serebro tras di e robo den detenshon.
E tres sospechosonan ku e keda detené na Kòrsou na desèmber 2021, ta den aresto preventivo ketu bai den SDKK. E investigashon ta kontinuá na Kòrsou i Hulanda i no ta ekskluí ku lo tin mas detenshon. Den interés di e investigashon no por duna mas informashon na e momento aki.