Detenshonnan nobo den investigashon Themis
Djabierne 5 di novèmber 2021, riba orden di Fiskal di Kòrsou, a detené e hende muhé L.E.L., di 36 aña di edat, i e hende hòmber G.A.R.P., di 60 aña, den e investigashon denominá Themis. Ta sospechá ambos di ta forma parti di un organisashon kriminal i di a partisipá den e labamentu di sèn deliktivo pa e mesun organisashon aki. A detené ambos sospechoso i nan a ser interogá varios biaha. A pone tur dos den libertat djadumingu 7 di novèmber 2021.
A identifiká L.E.L. y G.A.R.P. aña pasá despues ku e investigashon finansiero kònter di e sospechosonan anteriomente detené a revelá ku probabelmente nan a fasilitá e labamentu di sèn deliktivo via di nan empresanan na Kòrsou. L.E.L. y G.A.R.P. ta direktor di nan propio empresa di propiedat (“real estate”) na Kòrsou. E sospecho ta ku nan lo a husa nan empresa pa skonde sèn deliktivo di e organisashon. Mirando e intensidat di e koperashon, ta sospechá nan di no a solamente aktua komo fasilitadó di e organisashon, sino ku tambe nan lo ta forma parti di e mesun organisashon aki.
E detenshonnan di L.E.L. y G.A.R.P. ta forma parti di e investigashon finansiero ku ta tumando lugá den Themis. E ophetivo ta lokalisá i eventualmente konfiská e rekursonan optené dor di kometé echonan kastigabel. For di e inisio di e investigation, a konfiská biennan den varios país. A konfiská biennan balioso na Kòrsou, Hulanda i Gran Bretania. Na tur tin dos kas, tres tereno, seis vehíkulo i varios biennan manera diamante, oloshinan karu i un gran kantidat di sèn kèsh. E montante total di e biennan konfiská ta suma un 2.700.000 NAf.
Themis ta e investigashon di delitunan kometé den e último añanan den diferente pais den Reino Hulandes i den eskterior. Spesífikamente pa e investigashon aki a forma un ekipo di investigashon spesial, ku ta konsistí di miembronan di kuerponan polisial di Sint Maarten, Kòrsou, Aruba i Recherche Samenwerkingsteam (RST). E ekipo investigativo aki ta ser dirigí dor di Fiskal di Sint Maarten i Fiskal di Kòrsou. Anteriormente, na novèmber 2020 i febrüari 2021, detenshonannan a tuma lugá den marko di e investigashon aki.