Detenshon den investigashonnan Jaque, Borealis i Kaus
Awe mainta, kuater empleado di Wardakosta i un èks empleado di Wardakosta a keda detené den e investigashonnan ku ta karga e nòmber JAQUE (3), BOREALIS (1) i KAUS (1). Siguientemente, sinku búskeda den kas i unu den un kantor a wòrdu realisá dor di e wes komisario.
E investigashon di JAQUE ta enfoká riba empleadonan di Wardakosta ku ta wòrdu sospechá di a yuda terser partidonan ku importashon di narkótika, loke ta kastigabel bou di e stipulashonnan di e Ordenansa di Opio 1960, manera a wòrdu amiendá. Durante e investigashon a bira konosí ku aparatonan di GPS a wòrdu poné den sekreto riba e botonan di Wardakosta dor di empleadonan di Wardakosta. Den e konekshon aki, kriminalnan por vigilá barkunan di Wardakosta den “real time”.
E investigashonnan di BOREALIS i KAUS ta enfoká riba datonan di SKY di empleadonan di Wardakosta ku ta sospechá di a yuda terser partido ku importashon di narkótika. No por deskartá ku lo por tin detenshonnan adishonal den e kasonan aki.