But i konfiskashon pa butamentu di fever riba kaminda publiko
Djárason 18 di mei Korte di Promé Instansia a kondená tres hòmber, S.H., J.S. en R.G., pa butamentu di fever riba kaminda públiko. Nan a haña but te ku NAF 1.000,- ku un tempu di prueba di tres (3) aña i a konfiská nan outonan kondishonalmente. Esaki ta nifiká ku nan lo pèrdè nan outo permanentemente si gara nan ta sea buta fever òf ta kometé kalke otro delitu (di tráfiko) atrobe den e tres añanan benidero. Ministerio Públiko (OM) ta satisfecho ku e verediktonan. Esaki ta demostrá ku e enfoke di e problema di fever ta funshonando. E kasonan ta konserní un Toyota Starlet hel i un Mazda RX7 bèrdè.
Tradishon
Tur dos outo tabata paresé ku frekuensia riba videonan di fever riba Facebook i den gruponan WhatsApp. Butamentu di fever ku outo i bròmer ta un fenómeno ku ta sosodé ku basta frekuensia na Kòrsou. E shownan por konta semper ku hopi públiko. OM ta konsiente ku hopi hende ta konsiderá butamentu di fever komo un tradishon i ku polis no mester mete ku esaki. Sinembargo OM i polis ta haña ku butamentu di fever no tin lugá riba kaminda públiko. Polis ta risibí hopi keho di molèster di zonidu i molèster (en general). Sobretodo, butamentu di fever ta hopi peligroso, pasó e públiko ta indefenso i tin un riesgo haltu pa aksidentenan grave.
Enfoke spesial di polis riba medionan sosial
For di desèmber 2021, Kuerpo Polisial di Kòrsou (KPC) huntu ku Ministerio Públiko a kuminsá mantené òrdu pa ku butamentu di fever di un manera mas intensivo. Polis no ta kontrolá solamente riba kaya, sino ku tambe ta hasi investigashon pa ku e videonan di fever riba medionan sosial. Di e manera aki a rekonosé e outo bèrdè i tambe esun hel, a lokalisá esaki nan i tambe a identifiká e doñonan. Na momentu ku deskubrí butamentu di fever, ta kita e outo- i bròmernan for di e doñonan i OM ta pidi Korte pa e konfiskashon, sea ku ta di forma kondishonal òf no. Konfiskashon ta nifiká ku no ta debolbé e vehíkulo, pero ku lo bende esaki òf e ta keda destruí.
E dos kasonan aki no ta úniko. Luna pasá tambe a konfiská un bròmer ku a usa pa buta fever i ku despues a wòrdu mandá riba un outo di polis. Den un otro kaso a konfiská un outo kondishonalmente. OM ta spera ku e manera di mantené òrdu nobo aki lo kondusí na un desplasamentu di butamentu di fever riba kaminda públiko pa butamentu di fever regulá kaminda gobièrnu por pone kondishon pa ku siguridat. OM i KPC lo kontinuá ku e mantenshon di òrdu aki.