Búskeda di testigu den outo kòrá chikí
Djaluna dia 27 di sèptèmber 2021 alrededor di 7.45 ‘or di anochi a tuma lugá un atrako armá na Dr. Maalweg. Na momentu ku e supuesto malechornan tabata hui, polis a tira riba e outo na altura di kaminda Duvert Boy Nicolina # 642. Despues di esaki e outo a bai para na un krusada na Hanenberg na altura di Hoenderberg # 38. Durante di e huida un di e okupantenan den e outo a bin pèrdè su bida. Landsrecherche Kòrsou ta investigando kiko eksaktamente a pasa.
For di e investigashon a resultá ku e shofùr òf un otro okupante(nan) di un outo kòrá chikí lo por konta mas di lokual a pasa durante e persekushon, i kiko a pasa na altura di Kaminda Duvert Boy Nicolina # 642. E persekushon a tuma luga alrededor di 7 ‘or, djaluna anochi 27 di sèptèmber 2021.
Landsrecherche Kòrsou ke drenta den kontakto ku e shofùr òf otro okupante(nan) di e outo kòrá chikí, pa motibu ku posiblemente nan tin informashon pertinente na e investigashon. Por drenta den kontakto ku Landsrecheche Kòrsou via telefon: +5999 465-0402.
Landsrecherche ta un organo investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.