Beslag den investigashonThemis
Riba 30 di ougùstùs 2022, den kuadro di e investigashon kriminal ‘Themis’ (riba órden di Ministerio Públiko), polis a pone beslag riba sinku propiedat na Kòrsou. A pone e beslag den marko di e Investigashon Finansiero Penal ku ta andando kontra di S.Q., kende Ministerio Públiko (OM) ta konsiderá komo un di e lidernan di ‘No Limit Soldiers (NLS)’. Ta sospechá Q. di a dirigí un organisashon kriminal duna órden pa ehekutá vários likidashon, sekuestro, i labamentu di plaka.
Presumibelmente, e echonan aki a keda kometé den diferente pais denter di Reino i tambe pafó di esaki. OM ta sospechá ku Q. a invertí sèn prosedente di aktividatnan kriminal den e sinku propiedatnan menshoná aki. Den konekshon ku esaki, banda di e ponementu di beslag, a skucha vários testigu riba 30 di ougùstùs 2022.
E investigashon ‘Themis’ ta ser kondusí bou di direkshon di OM Kòrsou i OM Sint Maarten i ta ser ehekutá dor di un ekipo di reshèrshi ku ta konsistí di miembronan di e kuerponan polisial di Kòrsou, Sint Maarten, Aruba i Recherche Samenwerkingsteam (RST). Q. su detenshon a tuma lugá den novèmber di 2021 na Dubai. OM di Kòrsou ta den espera di su ekstradishon. E proseso di ekstradishon aki ta tuma su debido tempu, mirando ku Reino Ulandes no tin un tratado di ekstradishon ku Dubai.