Ámtenar di Duana detené riba sospecho di korupshon atministrativo
BONEIRU - Durante un tempu kaba, Reshèrshi di Reino (Rijksrecherche), bou di guia di Ministerio Públiko BES, ta realisando un investigashon penal tokante korupshon atministrativo di un ámtenar di Duana di servisio di impuesto/ duana Karibe Hulandes.
Awe, djaluna 7 di febrüari 2022 den kuadro di e investigashon i bou di guia di wes-komisario den kolaborashon ku Kuerpo Polisial Karibe Hulandes (KPCN) algun entrada hudisial a tuma lugá na Boneiru. Ta trata di entradanan den ofisina di Duana i un bibienda. Un hòmber di 56 aña a keda detené. Durante di e entradanan, a konfiská dokumentunan i portadó nan di informashon den interes di e investigashon. Investigashon den e kaso aki ta kontinuá.
For di ougùstùs 2020, Reshèrshi di Reino (Rijksrecherche) ta permanentemente presente den Karibe Hulandes (Boneiru, Sint Eustatius i Saba) ku nan base na Boneiru. Riba e wèpsait: www.rijksrecherche.nl por haña un splikashon di e método di trabou di Rijksrecherche.