Agentenan di KPC i miembro di VKC dilanti hues
Awe, 20 di sèptèmber 2024, 3 agente di Kuerpo Polisial di Kòrsou (KPC) i un (1) miembro di VKC a presentá dilanti di Korte. Ta akusá dos agente di KPC i un (1) miembro di VKC ku riba 27 di sèptèmber 2021, a tira vários biaha riba e parti patras di un outo. Sospechosonan di un atrako tabata tratando di hui den e outo aki. Durante di esaki vários bala a perforá e outo i a alkansá un sospechoso di 18 aña di edat mortalmente.
Manera ta usual den insidentenan di tiroteo ku ta impliká agentenan polisial i kaminda tin víktima, Landsrecherche di Kòrsou a hasi e investigashon pa ku e tiroteo aki riba órden di Ministerio Públiko (OM). Ta di hopi importansia pa hasi investigashonnan independiente di tiroteonan kaminda tin polis embolbí. Durante di e investigashon, e sospecho a surgi ku e agentenan polisial i e miembro di VKC impliká no a papia bèrdat. Ademas e sospecho a surgi ku e hefe di ekipo tabata tin un papel importante den esaki. E polisnan impliká i e miembro di VKC a konfesá esaki tambe.
Ministerio Públiko ta di opinion ku for di e investigashon a resultá ku e agentenan di KPC i e miembro di VKC no a aktua segun e reglanan ku ta stipulá den e situashon aki, manera ta indiká den instrukshon di kargo di polis. Pa e motibu aki, Ministerio Públiko a tuma e desishon pa persiguí e agentenan i e miembro di VKC pa e echonan di kometé di homisidio i intento di homisidio. Ministerio Públiko a demandá un kastigu di trabou di 240 ora i un destitushon di kargo kondishonal i un periodo di prueba di tres (3) aña pa esnan ku a tira. E lider di e tim a keda persiguí dor di Ministerio Públiko pa falsifikashon di dokumento i abusu di su funshon i a demanda un kastigu di trabou di 240 ora mas un kastigu di prizòn kondishonal di tres luna ku un periodo di prueba di tres (3) aña pe. Pa motibu ku na tur momentu mester konfia riba integridat di polis, Ministerio Públiko a demanda destitushon di kargo pa sinku (5) aña inkondishonal tambe. Na momentu esaki no ta e kaso, segun Ministerio Públiko, un persona no por bai bek na e funshon di agente polisial. Dia 11 di òktober 2024, hues lo dikta sentensia den e kaso aki.
Ministerio Públiko ta para pa un Kòrsou seif i hustu. Kuerpo polisial ta hunga un ròl importante den mantenshon di órden públiko i seguridat di e isla i su habitantenan. Pa e motibu aki, Ministerio Públiko ta husga aktuashon di agentenan polisial semper ku hopi koutela, sigur ora ta hasi uso di monopolio di violensia.