Agente di KPC dilanti hues
Awe, djárason 17 di mei 2023, un agente polisial di Kuerpo Polisial Kòrsou (KPC) a presentá dilanti hues. E agente a tira dia 14 di aprel 2022 riba un sospechoso pa purba deten’é despues di un (intento di) kiebro den un negoshi. E sospechoso a keda heridá na su rudia i mester a oper’é.
Landsrecherche Kòrsou a hasi un investigashon di e insidente aki riba órden di Ministerio Públiko (OM). OM ta di opinion ku for di investigashon a sali na kla ku e agente no mester a tira segun regla stipulá pa esaki den e instrukshon ofisial. OM a persiguí e agente pa maltrato severo i a demanda un kastigu di trabou kompletamente kondishonal di 24 ora ku un periodo di prueba di 1 aña. Dia 6 di yüni, hues lo dikta sentensia.
Ministerio Públiko ta para pa un Korsou seif i hustu. Polis ta hunga un rol grandi pa mantené órden públiko i seguridat di e isla i su habitantenan. Ministerio Públiko ta evaluá aktuashon di ámtenarnan di polis semper ku hopi koutela, sigur kaminda ta trata uso di monopolio di violensia.