A kaba investigashon riba kontròl di polis na Marnix college
WILLEMSTAD – Landsrecherche Kòrsou a hasi un investigashon amplio pa ku e kòntròl di polis ku a tuma lugá dia 7 di sèptèmber di aña pasá na Marnix College. Landsrecherche Kòrsou a skucha e alumnonan konserní i vários mayornan komo testigu den esaki. Tambe a skucha dosentenan i otro personanan di interes. Despues di interogashon di shete sospechoso, a rònt af e investigashon i entregá esaki na Ministerio Públiko (OM).
E investigashon a demostrá ku un asina yamá “kòntròl riguroso” a tuma lugá den e kamber di direktiva (directiekamer) di Marnix College. A keda establesé ku tres agente polisial a ordená mas ku 25 alumno pa desnudá (parsialmente). OM a establesé ku e base legal pa e “kòntròl riguroso” tabata falta. Pa e motibu aki, e aktuashon di e tres agentenan polisial lo keda presentá na un hues di Korte di Promé Instansia di Kòrsou. E fecha di e seshon no ta konosí ainda.
Un di kuater agente polisial tambe a kontrolá algun alumno sin un base legal. Sinembargo, por kalifiká e kòntròl aki komo ménos impaktante ku e aktuashon di e tres otro agentenan. Pa e motibu aki, Kuerpo Polisial Kòrsou (KPC) lo trata e aktuashon di e agente aki disiplinariamente. Denter di e investigashon ta tin trese otro persona embolbí ku e keda konsiderá komo sospechoso. E investigashon no a demostrá ku nan a hasi nan mes kulpabel na ningun echo kastigabel. Pa e rason aki a seponé nan kasonan.
Asina leu ku tabata posibel, e mayornan i e alumnonan konserní a ser informá di e resultadonan di e investigashon via di telefòn i por eskrito. Ta duna nan e oportunidat pa haña un splikashon mas detayá. A informá e sospechosonan, direktiva di skol i KPC. Esaki ta un investigashon penal aktivo ku lo keda presentá na Korte, e kobertura di informashon di parti di OM lo ta reservá.
Landsrecherche ta un órgano investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.