A detené un di dos sospechoso den investigashon di morto di Mike Venema
Djabièrnè 31 di mei polis a detené otro sospechoso den e kaso Mike Venema. Ta trata di un dama di 24 aña di edat. Ta sospechá ku e tambe ta involukrá den e kaso ku a hiba na morto di Mike Venema kende nan a haña den su pikòp djabièrnè 5 di yüli 2019 den fondo di Laman di Karibe.
Mike, di 53 aña, na momentu di su desaparishon, tabata biba den un apartamentu na Anasaweg, Kòrsou, pero promé ku e la disparsé e tabata keda den un kas na Jan Sofat (resort). Despues di un investigashon ekstenso polis ta suponé ku ta trata di un krímen. Despues di konsulta ku outoridatnan na Kòrsou a disidí ku lo hiba un investigashon konhunto.
Sospechoso ta den detenshon ainda
Djamars 28 di mei polis a detené un dama di 26 aña di edat bibá na Rotterdam den e kaso akí. E sospechoso akí ta den detenshon ainda.
Investigashon ekstenso.
E detenshon ta resultado di un investigashon a largo plaso den estrecho kolaborashon ku polis di Kòrsou. E kaso ta den pleno investigashon i no ta ekskluí ku lo tin mas detenshon den e kaso akí.
Kobertura den prensa
Pa medio di e programanan di búskeda Team West, Opsporing Verzocht i retnan sosial a pidi atenshon pa e kaso akí. Foundation Peter R. de Vries tambe a pidi atenshon p’e kaso aki i a pone un rekompensa na disposishon. Despues di e yamadanan akí polis a haña diferente tep.
Polis ta traha frekuentemente ku emisoranan nashonal i regional riba tereno di komunikashon di investigashon. Asina nos ta logra resolvé ku regularidat kasonan ku yudansa di tep.