9 sospechoso dilanti hues pa trafikashon di droga via di haf

E investigashon ku a keda ehekutá dor di RST a revelá patronchinan alarmante di krímen organisá i trafikashon di droga den haf, den kua kada sospechoso tabatin un ròl importante.

For di e investigashon a sali na kla ku e sospechosonan a kolaborá durante un periodo largu di un manera zetá na importashon i eksportashon di kantidatnan grandi di droga. Durante tratamentu di e kaso, fiskal a kalkulá ku ta trata di un kantidat di droga ku un balor di mas ku 100 mion euro/200 mion florin riba kaya. Ministerio Públiko a indiká durante tratamentu di e kaso ku lo purba kita e suma aki for di e sospechosonan pasombra krímen no mag paga. 

For di e investigashon a sali na kla ku tabata trata di un kolaborashon kriminal ku di un manera hopi destabilisá tabata hasi uso di personal di haf. Trahadónan di haf ku mester a pèrkurá pa seguridat i òrdu den haf, den e investigashon aki a resultá di ta korupto i ku a fasilitá trafikashon di kokaina.

Diferente di e sospechoso den e investigashon aki tabata hasi uso di telefòn SKY-ECC. E komunikashon desblokeá di e telefònnan aki a duna e tim di investigashon un bista den e bida kriminal di e sospechosonan. E mensahenan a duna un bista kla di aktividatnan di e grupo aki i alabes a pone mas transporte di droga riba mapa.

Ministerio Públiko ta determiná pa aktua kontra di trafikashon di droga organisá i lo tuma pasonan adishonal pa tene e sospechosonan responsabel pa nan aktonan. 

Fiskal a demanda pa importashon i eksportashon di droga, trámite di preparashon pa esaki i poseshon di arma di kandela kastigunan entre 5 ku 15 aña pa e sospechosonan.