Ministerio Públiko ta duna atvertensia severo kontra trafikashon di menornan di edat
Ministerio Públiko di Kòrsou (OM CUR) a konstatá un oumento bisto di trafikashon di menornan di edat, partikularmente entre Venezuela i Kòrsou. Pa motibu di e echo aki, Ministerio Públiko ta duna un atvertensia severo na tur persona impliká, inkluso mayor- i tutornan, pa nan desistí di kometé e akto kriminal aki.
E muchanan trafiká tin entre kuater i 15 aña di edat i frekuentemente nan ta biaha riba embarkashon ku alabes ta transportá droga i armanan di kandela.
E transporte di menornan di edat riba embarkashon ta trese kuné un riesgo enorme. E barkunan chikitú por kapsèis fásilmente durante e travesia, pues e muchanan ta kore riesgo di hoga. E echo ku tin supstanshanan ilegal i armanan di kandela na bordo ta peligrá e bida di e grupo vulnerabel aki ainda mas.
OM CUR ta atvertí públiko ku trafikashon di menornan di edat ta un infrakshon grave di lèi ku ta wòrdu kastigá severamente.
Ta supliká komunidat pa ta alerta riba e tipo di kriminalidat aki, pa denunsiá kasonan na polis i pa atvertí otro hende di e peligernan ku trafikashon di menornan di edat ta trese kuné, tantu pa e muchanan konserní komo pa sosiedat.